.png)
Гарантияле ярдәм ярдәмендә Казаннан торба үткәргеч арматура җитештерүче компания үсешенә 30 млн сум күләмендә заем финанславын җәлеп итә алды.
2011 елда оешкан «АЗ АТОМ» ҖЧҖ компаниясе «Химград» Технополисы резиденты булып тора. Компаниянең төп эшчәнлек төре – ябу-көйләү арматурасын җитештерү.
2023 елда Татарстан җитештерүчесе Инновацияләргә ярдәм фонды грантын алды, аның акчаларына җитештерелә торган продукция ассортиментын арттыру өчен җиһазлар сатып алынды.
Шул ук елда компания, җитештерүне үстерү максатларында, Татарстан Республикасы Икътисад министрлыгы карамагындагы Татарстан Республикасы Гарантия фонды ярдәмендә кредит оешмасыннан 30 млн сум заем финанславы җәлеп итә алды. Фонд, компаниянең залог белән тәэмин ителеше булмаган килеш, 15 млн сум күләмендә банк кредиты буенча поручитель буларак катнашты.
Исегезгә төшерәбез, финанс оешмаларында заемлы финанслауны рәсмиләштергәндә гарантияле ярдәмгә җитештерү, төзелеш, авыл хуҗалыгы кебек өстенлекле тармакларда беренче чиратта эшчәнлек алып баручы эшмәкәрләр дәгъва итә ала. Искәрмә булып уен бизнесы, финанс һәм иминият хезмәтләре белән шөгыльләнүче эшмәкәрләр тора.
Бүгенге көндә «АЗ АТОМ» ҖЧҖ кече технологик компания статусына ия, ул импортны алмаштыра торган продукциянең киң линейкасын җитештерә: төгәл көйләүле басым регуляторлары, ябу-көйләү клапаннары, кисемле клапаннар, сәнәгать һәм коммуналь билгеләнештәге торбаүткәргечләр өчен саклагыч клапаннар. Заводның үз җитештерү базасы, проект һәм конструкторлык бюросы, сынау стендлары һәм лабораториясе бар.
Компания бөтен Россия буенча нефть химиясе һәм газ эшкәртү предприятиеләренә, тау–баету комбинатларына һәм җылылык комплексларына, шул исәптән «Росатом» дәүләт корпорациясе объектларына продукция җибәрә.
Компания җитештерү егәрлекләрен киңәйтү хисабына чыгарыла торган продукция ассортиментын арттыруны планлаштыра.
«Махсус кече технологик компанияләр өчен 2025 елда «Высокотех» ташламалы кредитлау федераль программасы эшли башлады, аның кысаларында компанияләр инвестиция һәм әйләнеш максатларына елына 14% ставка белән 1 млрд сумга кадәр акча алырга мөмкин. Әлеге программаның вәкаләтле банкы булып безнең партнерларның берсе – МСП Банк тора. Кредит биргәндә залог белән тәэмин итү җитәрлек булмаган очракта, без килешү буенча поручитель була алабыз», – дип билгеләп үтте Татарстан Республикасы Гарантия фонды директоры Рөстәм Мөхәммәдшин.
Гарантияле ярдәм буенча тулырак консультацияне +7(843)293-16-94, +7(903)061-40-18 телефоннары буенча, шулай ук Фондка түбәндәге адрес буенча мөрәҗәгать итеп алырга мөмкин: Казан шәһәре, Мәскәү ур., 55 йорт.
Эшмәкәрләргә ярдәмнең шул исәптән «Эффектив һәм конкурентлы икътисад» илкүләм проекты кысаларында ТР Икътисад министрлыгы карамагындагы «Минем бизнес» төбәк үзәге тарафыннан гамәлгә ашырылуын билгеләп үтәбез.
