Гарантияле республика ярдәме нәтиҗәсендә, Татарстан бизнесы «Кече һәм урта эшмәкәрлек» илкүләм проектын гамәлгә ашыру кысаларында 2024 елның I яртыеллыгында 4,54 млрд сумлык заем финанславын җәлеп итә алды.
Агымдагы елның алты аенда республиканың 383 эшмәкәре Татарстан Республикасы Гарантия фондының 1,92 млрд сумлык поручительлеге рәвешендә дәүләт ярдәменнән файдаланды. Бу аларга бизнеска 4,54 млрд сумлык заем финанславын җәлеп итәргә мөмкинлек бирде.
Татарстан Республикасы Икътисад министрлыгы карамагындагы Татарстан Республикасы Гарантия фонды финанс оешмалары бәяләмәсе буенча тотрыклы финанс хәленә ия, әмма кредит алу өчен залог белән җитәрлек тәэмин ителмәгән республика эшмәкәрләре йөкләмәләре буенча поручительлек бирә.
Партнерлык финанславы программасы кысаларында Татарстан Республикасы Гарантия фонды тарафыннан Россия ислам университеты белән берлектә ислам хокукы кануннарына туры килә торган һәм Татарстан Республикасы мөселманнары Диния нәзарәте Улемнары Советының 2024 елның 14 февралендәге 72 номерлы поручительлек бирү буенча яңа финанс продукты рөхсәт ителү турындагы рәсми карары нигезендә гамәлдә булган «Даман» гарантия продукты эшләнде.
«Даман» продукты ярдәмендә Татарстан Республикасының 6 эшмәкәре Татарстан Республикасы Гарантия фондының 8,1 млн сумлык ярдәменнән файдаланды инде, бу эшмәкәрләргә шәригать нормалары нигезендә җитештерүне үстерү өчен 31,4 млн сумлык товар сатып алырга мөмкинлек бирде.
Исегезгә төшерәбез, Татарстан Республикасы Гарантия фондының «Даман» продукты буенча поручительлегенең максималь суммасы 50 млн сум, поручительлек күләме – йөкләмә суммасының 50% кадәр тәшкил итә.
Шуны да билгеләп үтәргә кирәк, Татарстан Республикасы Гарантия фонды партнерлары булып партнерлык финанславы буенча экспериментта катнашучылар буларак Россия Федерациясе Үзәк банкы сайтында реестрда торган һәм Татарстан Республикасы Гарантия фонды белән хезмәттәшлек турында килешү төзегән оешмалар тора.
Татарстан эшмәкәрләре Татарстан Республикасы Гарантия фонды сайтында, +7(843)293-16-94, +7(903)061-40-18 телефоннары аша, шулай ук Казан шәһәре, Мәскәү ур., 55 адресы буенча фондка мөрәҗәгать итеп гариза бирә, үз бизнесларын гарантия ярдәме алу шартларына туры килү-килмәвен тикшерә һәм ташламалы программалар турында тулырак мәгълүмат ала ала.
Татарстан Республикасында илкүләм эшмәкәрләргә ярдәм итү Татарстан Республикасы Икътисад министрлыгы карамагындагы «Минем бизнес» үзәге тарафыннан Россия Федерациясе Президенты Владимир Путин инициативасы белән оештырылган «Кече һәм урта эшмәкәрлек һәм шәхси эшмәкәрлек инициативасына ярдәм» илкүләм проекты кысаларында гамәлгә ашырыла.
