Татарстан Республикасының Икътисад министрлыгы карамагындагы Гарантия фонды шәригать һәм ислам законнары нигезендә хезмәт күрсәтә торган «Мир Бизнес Банк» АҖнең өстәмә офисын ачуда катнашты. Тантаналы чара 2023 елның 26 октябрендә Казанда Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов һәм Иран Ислам Республикасы икътисад министры урынбасары Мөхәммәт Җәүдәт Шәрифзадә җитәкчелегендәге Иран делегациясе катнашында узды.
Татарстан Республикасы территориясендә «Мир Бизнес Банк» АҖ эшчәнлеге – Татарстан-Иран хезмәттәшлеген гамәлгә ашыруга конкрет мисал. 2019 елда Казанда оештырылган «Мир Бизнес Банк» АҖ бүлекчәсе үсеш ала бара, аның эшчәнлеге Иран Ислам Республикасы һәм Татарстан Республикасы предприятиеләре арасында тышкы сәүдә әйләнешен үстерүгә ярдәм итә.
2022 ел нәтиҗәләре буенча Татарстан белән Иран арасында товар әйләнеше 183 млн доллар тәшкил итте, ә 2023 елның беренче яртыеллыгында 113 млн доллардан артып китте, бу 25% үсеш турында сөйли.
«Мир Бизнес банкның бүлендек оешмасы - Ислам финанслау принципларына туры китереп финанслауны тәкъдим итә торган Мирас Финанс Компаниясенең нәкъ менә Татарстан Республикасында эшчәнлек алып баруы икеләтә куанычлы. Эксперимент кысаларында әлеге мәсьәлә буенча нәтиҗәле хезмәттәшлеккә өметләнәбез», – дип билгеләп үтте Татарстан Республикасы Премьер-министры урынбасары – Татарстан Республикасы икътисад министры Мидхәт Шаһиәхмәтов.
Исегезгә төшерәбез, 2023 елның 1 сентябреннән Татарстанда, Башкортстанда, Дагыстанда һәм Чечняда партнерлык (Ислам) финанславын гамәлгә кертү буенча ике еллык эксперимент башланды. Тиешле закон 2023 елның августында кабул ителгән иде.
